Azərbaycan, Bakı, 27 avqust / Trend , müxbir E.İsmayılov /
ARDNŞ (Azərbaycan Respublikası Dövlət Neft Şikrəti) Xəzərin Azərbaycan sekorunda "Bahar-2" perspektivli qaz-kondensat strukturunda üçölçülü seysmik araşdırmalara (3D seysmik) başlayıb. Bu barədə ARDNŞ-nin məlumatında deyilir. Şirkət bu strukturda dərin quyu qazmaq niyyətindədir.
İşləri ARDNŞ-nin "Geofizik-1", "Geofizik-2" və "Bakı" gəmiləri aparacaq. Neft-qaz strukturunun axtarışı üçün geoloji kəşfiyyat 6-8 kilometr dərinlikdə aparılacaq. İşlər şirkətin Geologiya və Geofizika idarələrinin əməkdaşları tərəfindən ABŞ istehsalı olan müasir avadanlıqlardan istifadə etməklə həyata keçiriləcək.
"Bahar" yatağı 1968-ci ildə aşkar olunub. Ötən əsrin 80-ci illərində yataqdan sutkada 10 milyon kubmetr təbii qaz hasil edilib. Bu da ölkənin qaza olan tələbatının 30-40 faizini ödəyib. Ötən 40 il ərzində yataqdan 128 milyard kubmetr qaz və 16,8 milyon ton neft və kondensat çıxarılıb.
Hazırda bu yataqdan sutkada 0,5 milyon kubmetr qaz və 20-30 ton kondensat çıxarılır. ARDNŞ-nin geoloqları "Bahar-2"-də hasilat imkanlarına nikbin yanaşırlar.
Məqalə müəllifi ilə əlaqə ünvanı: [email protected]
