Azərbaycan, Bakı, 1 oktyabr / Trend , N. İsmayılova/
Azərbaycanın sənaye və energetika naziri Natiq Əliyev bildirib ki, Transxəzər layihəsinin reallaşdırılması (Qazaxıstan neftinin Azərbaycan ərazisi vasitəsilə daşınması üzrə layihə) üçün Qara dəniz regionu istiqamətində olan bütün marşrutlardan - Batumi və Kulevi dəmir yolu xəttindən və həmşinin Supsa kəmərindən istifadə olunmalıdır.
Nazir deyib ki, Qazaxıstan öz neftinin Xəzər dənizi və Azərbaycan ərazisi vasitəsilə Qara dəniz regionuna daşınmasında maraqlıdır. Daşınma üçün həm dəmir yol xətlərindən, həm də neft boru kəmərlərindən istifadə oluna bilər.
Nazir belə hesab edir ki, Qazaxıstan tərəfi Bakı-Batumi marşrutunda maraqlıdır. Belə ki, Qazaxıstana məxsus Batumi neft terminalı burada yerləşir. Azərbaycan tərəfi isə neftin dəmir yolu xətti vasitəsilə bu ölkəyə məxsus Kulevi terminalına daşınmasında maraqlıdır.
Nazir əlavə edib ki, marşrutlar arasında neftin daşınması üzrə bölgüdən danışmaq hələ tezdir.