Azərbaycan, Bakı, 06 noyabr / Trend , müxbir E.İsmayılov/
2009-cu ilin sonunadək Middle East Petrol (Azersun Holding-ə daxildir) Azərbaycan neft terminalı vasitəsilə 8 milyon ton neft və neft məhsulları daşımağı planlaşdırır. Bu barədə Azersun Holding-in prezidenti Abdulbarı Gözəl bildirib.
Gözəlin bir müddət əvvəl dediyi kimi, keçən il Azərbaycan ərazisi vasitəsilə təqribən 7,7 milyon ton neft nəql olunub.
Middle East Petrol şirkətinin neftinin böyük hissəsi Dübəndidəki neft terminalı vasitəsilə nəql olunur. Gözəlin sözlərinə görə, ilin əvvəllərində bu neft terminalı vasitəsilə təqribən 4 milyon ton neft nəql olunub. "Fikirləşirəm ki, bu ilin sonunadək biz bu rəqəmi beş milyona çatdıracağıq", - Gözəl əlavə edib.
"Dübəndi terminalı tək deyil, həmçinin Bakı və Səngəçal terminalları var və bütün bu terminallar vasitəsilə bu ilin sonunadəki 8 milyon ton neftin daşınması planlaşdırılır", - Gözəl deyib.
Onun sözlərinə görə, hazırda Gürcüstandakı Kulevi Azərbaycan Qara dəniz terminalı vasitəsilə Qazaxıstanın "Tengiz" yatağından neft nəqlinin başlanması üçün işlərə start verilib. Bu istiqamətdə danışıqlar gedir və ehtimal var ki, Tengiz neftinin Kulevi terminalı vasitəsilə nəqlinə bu ilin sonuna dək başlanılacaq.
Qazaxıstanın "Tengiz" yatağında işlər aparan ABŞ-ın ChevronTexaco şirkəti 2008-ci ildə "Bakı-Tbilisi-Ceyhan" (BTC) boru kəməri ilə neft nəqlinə başlayıb. Müqavilənin şərtlərinə uyğun olaraq, Tengiz neftı Gürcüstan limanlarına (Kulevi və Batumi) kimi BTC boru kəməri və dəmiryol vasitəsilə də nəql ediləcək.
Kulevidəki terminalın ümumi yükboşaltma gücü ildə 2 milyon ton neft, 3 milyon ton dizel yanacağı və 4 milyon ton mazut daxil olmaqla, 10 milyon ton neft məhsullarıdır. Terminalda keçid kanalının dibinin dərinləşməsi ilə bağlı işlər artıq sona çatıb və hətta terminal "Afromaks" tipli tanker də qəbul edib.
Məqalə müəllifi ilə əlaqə ünvanı: [email protected]