Azərbaycan, Bakı, 02 mart / Trend /
ARDNŞ-nin (Azərbaycan Respublikası Dövlət Neft Şirkəti) Kompleks Qazma İşləri Tresti ətraf mühitin qorunması, ekoloji vəziyyətin yaxşılaşdırılması istiqamətində quruda və dənizdə bir sıra tədbirlər həyata keçirir. Bu barədə ARDNŞ-nin Ekologiya İdarəsinin rəsmi internet saytında yerləşdirilmiş məlumatda deyilir.
İstehsalat prosesi zamanı yaranan qazma şlamlarının utilizasiyası məqsədi ilə Trest onu mütəmadi olaraq ARDNŞ-nin Ekologiya İdarəsinin Tullantı Mərkəzinə təhvil verir. Trestin idarələrində istehsalat prosesində formalaşan digər tullantılar və istismara yararsız avadanlıqlar növləri üzrə yığılaraq, onların təhvil verilməsi üçün müvafiq təşkilatlarla müqavilələrin bağlanması işləri həyata keçirilməkdədir.
Dəniz özüllərində iş prosesində yaranan çirkab suların dənizə axıdılmasının qarşısının alınması məqsədi ilə Xəzər Dəniz Neft Donanması İdarəsində çirkab sularının utilizasiyası nəzərdə tutulub.
Bütün işlər 2010-cu ildə nəzərdə tutulan ətraf mühitün müdafiəsi, ekoloji vəziyyətin yaxşılaşdırılması, ekoloji tarazlığın bərpası istiqamətində tədbirlər planı çərçivəsində aparılır.