Azərbaycan, Bakı, 3 may /Trend, müxbir E.İsmayılov/
ARDNŞ Qara dəniz Kulevi neft terminalı vasitəsilə ildə 4 milyon tona kimi neft yüklərinin daşımalarının həcmini artırmağı planlaşdırır. Bu barədə terminaldakı mənbə bazar ertəsi bildirib. Hazırda terminal ildə 2,3-2,4 milyon ton neft yükü hesabı ilə işləyir.
"Yaxın vaxtlarda terminala əlavə yükdaşımalarının cəlb edilməsi hesabına yükdaşımalarını ildə 4 milyon ton səviyyəsinə çatdırmaq planlaşdırılır", - mənbə bildirib.
Onun sözlərinə əsasən, bu ilin birinci rübündə terminal tərəfindən 550 min ton neft yükü daşınıb ki, bu da ötən ilin analoji göstəricisindən 15 faiz çoxdur.
Gürcüstan hökuməti tərəfindən əvvəl yayılan məlumata əsasən, ötən il Kulevi terminalından 2,1 milyon ton yük daşınıb. Bu göstərici 2008-ci ildə 1,3 milyon ton təşkil edib. 2009-cu ildə terminal 99 gəmi emal edib. Bu göstərici 2008-ci ildə 65 gəmi təşkil edib.
Kulevi terminalı istismara 2008-ci ilin mayında verilib. Neft məhsullarının faktik olaraq boşaldılmasına iyundan başlanılıb. Terminalda yüklərin boşaldılıb-yüklənməsinin ümumi gücü ildə 10 milyon ton neft yüküdür. Bura üç milyon ton neft, üç milyon ton dizel yanacağı, dörd milyon ton mazut daxildir. Rezervuar parkının ümumi tutumu 320 min kubmetr təşkil edir və 380 min kubmetrədək artırılması mümkündür.
Neft əməliyatları üçün terminalda neft məhsullarının 100 min tonadək yükgötürmə qabiliyyətinə malik tankerə doldurulması üçün iki yanalma körpüsü nəzərdə tutulub. Məhsuldarlıq saatda 1000-dən 8000 kubmetrədək neft doldurulması təşkil edir. Müəssisədə liman dəmir yolu stansiyası da var ki, burada eyni vaxtda yükün boşaldılmasını gözləyən 180 vaqon-sistern yerləşdirmək mümkündür. Dəmir yolu estakadalarında eyni vaxtda 168 vaqon-sistern boşaldılması mümkündür.