Azərbaycan, Bakı, 10 avqust /Trend, müxbir E.İsmayılov/
İlin birinci yarısında Bakı-Tbilisi-Ərzurum qaz kəməri ilə qaz nəqlinin orta sutkalıq həcmi 15 milyon kubmetr (neft ekvivalentində 93 min barel) təşkil edib. Bu barədə bp şirkətinin rəsmi hesabatında deyilir.
Ötən il "Bakı-Tbilisi-Ərzurum" qaz kəməri ilə (Cənubi Qafqaz qaz kəməri) "Şahdəniz" yatağından 15 milyon kubmetrə yaxın qaz (neft ekvivalentində 92 min bareldən çox) nəql olunub.
Hesabatda deyildiyi kimi, bu ilin yanvar-iyun ayları ərzində bu layihə çərçivəsində kapital qoyuluşları 4,9 milyon dollar təşkil edib.
Ötən il bu boru kəməri üzrə əsaslı xərclər yeddi milyon dollar təşkil edib, cari ildə isə bu xərclər 12,7 milyon dollar səviyyəsində proqnozlaşdırılır.
2009-cu ildə "Bakı-Tbilisi-Ərzurum" qaz kəməri ilə 2008-ci ildəki 4,7 milyard kubmetrə qarşı 5,2 milyard kubmetr qaz nəql olunub.
"Bakı-Tbilisi-Ərzurum" kəmərinin uzunluğu (Cənubi Qafqaz boru kəməri) 700 kilometrdən çoxdur. Xəzər dənizinin Azərbaycan sektorunda "Şahdəniz" qaz-kondensat yatağında hasil olunan qaz kəmər vasitəsilə nəql olunur. Qaz Gürcüstan və Türkiyəyə daşınır. Azərbaycan da qaz alıcısı kimi iştirak edir.
