Azərbaycan, Bakı, 16 avqust /Trend, müxbir E.İsmayılov/
Azərbaycanın sıxılmış qazının Qara dəniz vasitəsilə Bolqarıstana tədarük edilməsi layihəsinin həyata keçirilməsi ildə iki milyard kubmetr optimal həcmdə qazın nəql ediləcəyi təqdirdə məqsədəuyğun olacaq. Bu barədə bazar ertəsi ARDNŞ-dəkı mənbə deyib.
Onun sözlərinə görə, bu layihə tərəflər arasında öyrənilmək və danışıqlar üçün vaxt tələb edən çox mürəkkəb bir layihədir. Lakin layihənin həyata keçirilməsi iki milyard kubmetr hesablanmada rentabelli olacaq.
Mənbənin dediyinə görə, bu həcmin bir hissəsi Bolqarıstana, qalan hissə isə başqa bazarlara göndərilə bilər. Məsələ öz növbəsində müvafiq qaz infrastrukturu sisteminin olmasından asılı olacaq.
Ötən il Azərbaycan və Bolqarıstan bir milyard kubmetr qazın tədarükü haqqında memorandum imzalayıblar.
Bundan öncə sənaye və energetika naziri Natiq Əliyevin dediyi kimi, Azərbaycan Bolqarıstana qaz tədarükünə Xəzərin Azərbaycan sektorunda böyük qaz kondensatı yatağı "Şahdəniz"in artıq işlənməsinin birinci mərhələsindən başlaya bilər.
ARDNŞ-də qeyd etdiklərinə görə, "Şahdəniz"dən əlavə qaz həcmi illik hasilatın 1,3 - 1,4 milyard kubmetrədək artırılması sayəsində (8,6 milyard kubmetr səviyyəsində nəzərdə tutulub) alınacaq. 8,6 milyard kubmetrlik həcm haqqında saziş artıq imzalanıb, bu qazın 6,6 milyard kubmetrni Türkiyə, qalan hissəni isə Azərbaycan və Gürcüstan alacaq.
Bolqarıstan KİV-in məlumatına görə, ötən həftə Bakıda "Bulgartransgaz"ın rəhbəri İvan Drenviçkinin iştirakı ilə Azərbaycan-Bolqarıstan işçi qrupunun görüşü keçirilib. Bu görüş çərçivəsində qeyd edilib ki, Bolqarıstan Azərbaycandan tədarük sayəsində öz təbii qaz tələbatının 50 faizini təmin edə bilər. Görüş zamanı vurğulanıb ki, layihə 2013-cü ildən tez reallaşa bilməz və Bolqarıstan lazımi infrastruktur tikildikdən sonra, ildə iki milyard kubmetr təbii qaz ala bilər.