Azərbaycan, Bakı, 7 oktyabr /Trend, müxbir E.İsmayılov/
Qazaxıstanın "Kaşaqan" yatağından böyük həcmdə neft Bakı-Tbilisi-Ceyhan boru kəməri ilə ixrac olunacağı halda, bu boru kəmərinin səhmdarları kəmərin buraxılış qabiliyyətinin artırılmasında maraqlı olacaqlar. Bu barədə cümə axşamı ARDNŞ-nin yüksək vəzifəli nümayəndəsi bildirib.
Onun sözlərinə görə, hazırda neft kəmərinin buraxılış qabiliyyəti sutkada 1,2 milyon barel təşkil edir. Perspektivdə boru kəməri ilə Azərbaycan neftinin və Xəzəryanı ölkələrin digər layihələri çərçivəsində əlavə həcmlərin nəqli zəruri olacağı halda, kəmərin buraxılış qabiliyyəti sutkada 1,6 milyon barelədək artırıla bilər.
ARDNŞ nümayəndəsinin dediyi kimi, hazırda Qazaxıstanda "Kaşaqan" yatağının işlənməsi layihəsi çərçivəsində işlər görülür və proqnozlara görə, 2018-2019-cu illərdə bu yataqdan böyük həcmdə neftin alınması planlaşdırılır. Bu neftin ixracına uyğun olaraq, onun Xəzər dənizindən keçməklə Bakı-Tbilisi-Ceyhan kəməri ilə nəqli variantına baxılır.
"Belə olan halda biz boru kəmərinin gücünün sutkada 1,6 milyon barelədək və ya başqa həcmlə işləməsində maraqlıyıq. Texniki baxımdan bütün mümkün varianlar nəzərdən keçirilir", - ARDNŞ nümayəndəsi qeyd edib.
Hazırda BTC boru kəməri ilə nəql edilən neftin əsas hissəsi Azərbaycanın "Azəri-Çıraq-Günəşli" dəniz yataqları bloku və "Şahdəniz" qaz-kondensat yatağının payına düşür. BTC ilə türkmən nefti də nəql olunur. 2008-2009-cu illərdə boru kəməri ilə ABŞ-ın "Chevron" şirkətinin birgə işlədiyi Qazaxıstanın "Tengiz" yatağından neftin nəqlinə başlanılıb. Lakin tariflərlə bağlı razılaşma əldə olunmadığından, bu ilin əvvəlindən kəmərlə qazax neftinin nəqli dayandırılıb.
BTC neft kəmərinin ümumi uzunluğu 1 768 km-dir. Bunun 443 km-i Azərbaycan, 249 km-i Gürcüstan, 1 076 km-i isə Türkiyə ərazisindən keçir. Boru kəmərinin uzunluğu boyunca səkkiz stansiya var. Onlardan ikisi Azərbaycanda, ikisi Gürcüstanda, dördü isə Türkiyə ərazisindədir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
