Azərbaycan, Bakı, 12 oktyabr /Trend, müxbir S.Süleymanov/
ARDNŞ Türkiyənin Ceyhan limanında Neft Emalı Zavodunun tikintisindən imtina etməyib. Bu barədə bazar ertəsi şirkətin yüksəkvəzifəli nümayəndəsi deyib.
"ARDNŞ Türkiyənin Ceyhan limanında NEZ-in tikintisi layihəsindən imtina etməyib, biz onu gələcək perspektivdə nəzərdən keçiririk", - şirkət nümayəndəsi qeyd edib.
Onun sözlərinə görə, indi ARDNŞ-nin bütün səyləri digər layihəyə - "Petkim" Neft-Kimya Kompleksinə yönəlib.
"Biz indi "Petkim"in bazasında yeni NEZ tikmək niyyətindəyik. Bu layihə daha ucuzdur və o, bizim xammalla işləyəcək", - mənbə izah edib.
Bundan əvvəl bir neçə şirkətin Ceyhanda neft emalı komplekslərinin tikintisi ilə bağlı planları olub. Belə ki, Qazaxıstan şirkətinin Türkiyə limanında illik 20 milyon ton neft gücünə malik böyük NEZ-in tikintisi ilə bağlı planı olub; lakin bu layihə də qəbul olunmayıb. Bundan başqa, Ceyhanda tikinti ilə Rusiyanın bəzi iri şirkətləri də məşğul olmaq istəyir.
İndi Ceyhana layihə gücü ildə 50 milyon ton neft təşkil edən "Bakı-Tbilisi-Ceyhan" (BTC) boru kəməri ilə çatdırılır. Türkiyə hökumətinin planlarında öz ərazisində daha bir boru kəmərinin layihə gücü ildə 50 milyon ton neft təşkil edəcək "Samsun-Ceyhan" boru kəmərinin tikintisi daxildir.
Bundan başqa, Ceyhana neft "Kərkük-Ceyhan" boru kəməri ilə çatdırılır. Boru kəmərinin gücü ildə 70 milyon ton təşkil edir.
