Azərbaycan, Bakı, 16 oktyabr /Trend/
Yanvar-sentyabrda ARDNŞ (Azərbaycan Respublikası Dövlət Neft Şirkəti) Azərbaycan əhalisinə 1,3 milyard kubmetrə yaxın qaz tədarük edib. Bu barədə şənbə günü ARDNŞ-dən məlumat verilib. Sentyabrda şirkət tərəfindən əhaliyə 62,5 milyon kubmet qaz verilib.
Doqquz ay ərzində şirkət tərəfindən sənaye müəssisələrinə 670,1 milyon, sentyabrda isə 62,4 milyon kubmetr qaz tədarük olunub.
Yanvar-sentyabrda kommunal büdcə müəssisələrinə 160,6 milyon, sentyabrda isə 3,1 milyon kubmetr qaz verilib.
Eləcə də yanvar-sentyabrda ARDNŞ tərəfindən Naxçıvan Muxtar Respublikası Dövlət Enerji Agentliyinə 71,6 milyon kubmetr qaz ötürülüb. Sentyabrda bu göstərici 9,3 milyon kubmetr təşkil edib.
Əvvəllər ölkə daxilində bütün qaz əməliyyatlarını "Azəriqaz" QSC həyata keçirirdi. Ötən ilin iyununda "Azəriqaz" QSC İstehsalat Birliyi qismində ARDNŞ-nin tərkibinə daxil edildi.
