Azərbaycan, Bakı, 8 dekabr /Trend, müxbir A.Bədəlova/
Beynəlxalq Energetika Agentliyi (BEA) Xəzər regionunda neft hasilatının ən yüksək hasilat həddinə - sutkada 5,4 milyon barelə 2025-2030-cu illərdə nail olunacağını proqnozlaşdırır. Məlumatda deyildiyi kimi, 2009-cu ildə hasilat həcmi 2,9 milyon barel təşkil edib.
BEA-nın proqnozlarına görə, 2035-ci ilə regionda neft hasilatı sutkada 5,2 milyon barelədək azalacaq.
BEA-nın proqnozlarına görə, Xəzər regionunun neft ixracı da artacaq və 2025-ci ildən dərhal sonra ən yüksək həddə - sutkada 4,6 milyon barelə çatacaq.
BEA-nın 2010-cu il üçün dünya iqtisadiyyatının perspektivləri üzrə məruzəsinə əsasən, Xəzər regionu neft və qaz tədarüklərinin diversifikasiyasının artırılması məqsədilə dünyanın enerji təhlükəsizliyinin təminində töhfə verə biləcək böyük potensiala malikdir.
BEA Xəzər regionunda qaz hasilatının 2020-ci ildə 2009-cu ildəki 159 milyard kubmetrə nisbətdə 260 milyard kubmetrədək artacağını proqnozlaşdırır. Hasilatın mənbəyi Türkmənistan, Azərbaycan və Qazaxıstan olacaq.
BEA-nın proqnozlarına görə, Xəzər regionunun qaz ixracı 2020-ci ildə 100 milyard kubmetrədək və 2035-ci ildə 130 milyard kubmetrədək artacaq. Bu göstərici 2009-cu ildə 30 milyard kubmetr olub.
BP-nin məlumatlarına görə, 2010-cu ilin əvvəlinə Azərbaycanda sübut edilən qaz ehtiyatları 1,31 trilyon kubmetr, Türkmənistanda 8,1 trilyon kubmetr, Qazaxıstanda 1,82 trilyon kubmetr təşkil edib.
