Azərbaycan, Bakı, 14 mart /Trend, müxbir E.İsmayılov/
Martın 14-nə olan məlumata görə, Azərbaycanın yeraltı qaz anbarlarında aktiv qaz həcmlərinin qalığı 1,6 milyard kubmetrə yaxın təşkil edir. Bu rəqəm fevralın 14-də 2,11 milyard kubmertə yaxın olub. Bu barədə bazar ertəsi ARDNŞ-dəki mənbə məlumat verib.
Mənbənin sözlərinə görə, hazırda yeraltı qaz anbarlarından 16,5 milyon kubmetr qaz götürülür. Fevralın 14-də bu rəqəm 21 milyon kubmetrə yaxın olub.
Hazırda qaz anbarlarından götürülən qazın ümumi həcmindən 8,6 milyon kubmetrə yaxın "Qalmaz" yeraltı qaz anbarının, 7,92 milyon kubmetr isə "Qaradağ" qaz anbarının payına düşür.
Onun sözlərinə görə, qaz yeraltı anbarlardakı 95 quyudan götürülür. Onların 65-i "Qalmaz", yerdə qalan 30-u isə "Qaradağ" qaz anbarında yerləşir.
Qaz vurulması mövsümünün başa çatmasının yekunu üzrə Azərbaycanın yeraltı qaz anbarlarında ehtiyatlar 3,05 milyard kubmert təşkil edib. Qaz anbarlarında olan qazın ümumi həcmindən 1,13 milyard kubmetrdən artığı ötən ildən qalıb.
