Azərbaycan, Bakı, 8 aprel /Trend, müxbir E.İsmayılov/
Azərbaycanın Standartlaşdırma, Metrologiya və Patent üzrə Dövlət Komitəsi və Sənaye və Energetika Nazirliyi neft və qaz üzrə texniki komitənin yaradılması çərçivəsində məsələləri razılaşdırırlar. Bu barədə cümə günü Trend-ə dövlət komitəsindən deyiblər.
Məlumata əsasən, müzakirə edilən məsələlər razılaşdırıldıqdan sonra komitə təsdiq ediləcək.
"Razılaşdırma prosesi uzun çəkməyəcək və yaxın vaxtlarda komitə təsdiq ediləcək", - dövlət komitəsindən bildiriblər.
Bundan əvvəl Dövlət Komitəsinin Texniki tənzimləmə və standartlaşdırma şöbəsinin müdiri Sabiq Abdullayevin dediyinə görə, komitənin tərkibinə yeddi komitə daxil olacaq. Texniki komitə bütün maraqlı tərəflərin, dövlət və qeyri-dövlət orqanlarının, neft və qaz istehsalçısı və satıcılarının forumudur. Komitədə ARDNŞ sədrlik edəcək.
Azərbaycanda bu sahədə həm milli AZS standartları, həm də regional dövlət standartları qüvvədədir.
"Bizim məqsədimiz milli standartların beynəlxalq standartlara uyğun olmasından ibarətdir", - Abdullayev bildirib.
Komitə neft və qaz sahəsində mövcud olan bütün standartları nəzərdən keçirəcək və onların günün tələblərinə cavab verməsini müəyyənləşdirəcək. Günün tələblərinə uyğunsuzluq aşkarlanacağı təqdirdə, Azərbaycanda neft-qaz sahəsində qazmadan başlayaraq neft məhsullarının istehsalınadək hansı standartların tətbiqinin lazım olduğu müəyyənləşdiriləcək. Hansı standartların tətbiqinin lazım olduğu müəyyənləşdirildikdən sonra isə tədbirlər planı hazırlanacaq və bunun əsasında bir neçə il ərzində Azərbaycanın neft və qaz sahəsindəki bütün standartlar fondu yenilənəcək.
