Azərbaycan, Bakı, 9 aprel /Trend, müxbirlər İ.Xəlilova, E.İsmayılov/
ARDNŞ-nin "Azərkimya" İstehsalat Birliyi son kimyəvi məhsulun istehsalı üzrə sənaye şəhərciyinin yaradılması çərçivəsində hazır məhsulun aparılmasının təmini üçün yanalma körpüsünün tikintisini planlaşdırır. Bu barədə Trend-ə şənbə günü İB rəhbəri Muxtar Babayev deyib.
Onun sözlərinə görə, yanalma körpüsünün tikintisinə başlama müddəti texnoloji parkın tikintisinə başlamağın müddətindən asılı olacaq. "Azərkimya" İB ərazisində sənaye şəhəriciyinin yaradılması layihəsi hazırda İqtisadi İnkişaf Nazirliyi ilə birlikdə fəal müzakirə edilir. İndi bu istiqamətdə işlər aktiv fazadadır, qanunvericiliyin hazırlanması üzrə iş gedir, eləcə də texnoloji parkın ərazisində hansı müəssisələrin yaradıla biləcəyi ilə bağlı bir sıra təkliflər hazırlanır.
"Bu, bilavasitə sənaye təyinatlı məhsulun buraxılması ilə bağlı layihə olacaq", - Babayev qeyd edib.
İlk növbədə, sənaye şəhərciyi ərazisində yerləşəcək müəssisələr İB-nin buraxdığı məhsulun əsasında işləyəcəklər, lakin bu halda digər strukturların da iştirakı istisna edilmir.
Sənaye şəhərciyi özəl əsasda işləyəcək. Burada əsasən artıq hazır məhsulun istehsalında iştirak edəcək kiçik və orta müəssisələr yerləşəcək.
Hazırda "Azərkimya" Sumqayıt şəhərində yerləşən müəssisələrdə yarımfabrikatlar istehsal edir. Bunun təxminən 92-93 faizi xaricə ixrac edilir, sonra artıq hazır məhsul şəklində idxal malları kimi Azərbaycana qaytarılır.
"Bizim bu gün istehsalın bir çox növlərini təşkil etmək, hazırda istehsal etdiyimizi ölkə daxilində hazır məhsula çevirmək imkanımız var", - Babayev vurğulayıb.
Texnoloji park yaradılarkən yeni texnologiyalardan istifadə ediləcək, müasir istehsal qurulacaq, bu isə əhalinin məşğulluq məsələsinin həllinə kömək edəcək.
"Azərkimya" rəhbərinin sözlərinə görə, İB xammal verməklə yanaşı, texnoloji parkı ərazi, infrastruktur və kommunikasiya ilə təmin edəcək.
Sənaye şəhərciyi yaradılarkən maliyyə mənbələri kimi xarici və dövlət investisiyaları kimi müxtəlif istiqamətlər nəzərdən keçiriləcək. Xüsusilə, İqtisadi İnkişaf Nazirliyi bu layihədə sənaye şəhərciyi ərazisində müəssisələrin həmtəsisçisi qismində çıxış edəcək Azərbaycan İnvestisiya Şirkəti vasitəsilə iştirak etməyi planlaşdırır.