Azərbaycan, Bakı, 20 aprel /Trend, müxbir E.İsmayılov/
Yanvar-martda Bakı Beynəlxalq Dəniz Ticarət Limanından 534 min ton neft yükləri daşınıb. Bu, ötən ilin müvafiq dövr göstəricisindən altı faiz çoxdur. Bu barədə çərşənbə günü Trend-ə Bakı limanındakı mənbə deyib.
"Yanvar-martda neft yüklərinin daşınmasında bir qədər artım müşahidə olunub. Habelə bu dövrdə 534 min ton həmin növdən yük daşınıb", - mənbə deyib.
Ümumilikdə 2010-cu ildə Bakı Beynəlxalq Dəniz Ticarət Limanından 1,99 milyon ton neft və neft məhsulları daşınıb ki, bu da 2009-cu ilin göstəricisindən 21 faiz azdır. Neft yüklərinin daşınma həcminin azalması Qazaxıstan və Türkmənistan neftinin tranzitinin ümumi həcminin azalması, eləcə də Mərkəzi Asiyadan olan neft yüklərinin bir hissəsinin hələ ötən il Səngəçal terminalına yönəldilməsi ilə izah edilir. Daşımanı "Cross Caspian" şirkəti həyata keçirir.
2009-cu ildə Bakı limanından 2,5 milyon ton neft yükləri daşınıb ki, bu da 2008-ci ildəki göstəricidən 10 faiz azdır. 2009-cu ildə liman vasitəsilə ümumilikdə, 5,1 milyon ton yük daşınıb.
