Azərbaycan, Bakı, 3 iyun /Trend, müxbir N.İsmayılova/
15 il ərzində Azərbaycan Dövlət Neft Fondu aktivləri 100 milyard dollara çatdırmağı planlaşdırır. Trend-in məlumatına görə, bu barədə cümə günü fondun icraçı direktoru Şahmar Mövsümov deyib.
"2011-ci ilin sonunadək Neft Fondunun vəsaitləri 30 milyard dollar səviyyəsində proqnozlaşdırılır", - Mövsümov bildirib.
ARDNF rəhbərinin bundan əvvəl dediyinə görə, yaxın beş il ərzində Azərbaycan Respublikası Dövlət Neft Fondunun aktivləri neftin 60, 70 və 80 dollar qiymətinə müvafiq olaraq 50, 65 və 80 milyon dollara çatacaq.
"Bu cür proqnozlar fondun xərclərinin hazırkı həcmi ötmədiyi halda verilir. Yaxın və uzunmüddətli perspektivdə neft hasilatı həcmləri qaz hasilatı həcmlərini ötərsə, qazın gəlirlərinin neftdən gələn gəlirləri ötəcəyi gözlənilmir", - Mövsümov deyib.
2010-cu ildə Dövlət Neft Fondunun gəlirləri 13 088,5 milyon manat, xərcləri 6386,5 milyon manat təşkil edib. ARDNF büdcəsinin gəlir hissəsi 144,9 faiz, xərcləri isə 99,4 faiz həcmində icra edilib. 2011-ci ilin birinci rübündə gəlirlər 3 259,6 milyon manat, xərclər isə 1 399,6 milyon manat olub.
Təsdiq olunmuş büdcəyə əsasən, 2011-ci ildə fondun gəlirləri 9 132, 941 milyon manat, xərcləri isə 6 886,155 milyon manat həcmində müəyyən olunub.
"Neft və qaz satışından alınan gəlirlərin effektli idarəsi nəticəsində 10 il ərzində fondun vəsaitləri 84 dəfə artıb. 2001-ci ildə Neft Fondunda cəmi 271 milyon dollar yığılıbsa, 2011-ci il yanvarın 1-nə olan nəticələrə görə fondun aktivləri 22,8 milyard dollara çatıb", - Mövsümov deyib.
Mövsümovun sözlərinə görə, hazırda Neft Fondunun aktivləri 28,8 milyard dollar təşkil edir.
Onun sözlərinə görə, bununla yanaşı, həmin dövr ərzində 2,6 milyard dollar infrastruktur və sosial layihələrə yönəldilib, 20 milyard dollara yaxın isə dövlət büdcəsinə köçürülüb. "Öz növbəsində, dövlət büdcəsi çərçivəsində mövcud vəsaitlər hesabına dövlət proqramları və qeyri-neft iqtisadiyyatı üzrə tədbirlər həyata keçirilib və nəticədə qeyri-neft sektorunun real artım sürəti 2010-cu ildə 7,6 faiz təşkil edib", - ARDNF rəhbəri deyib.
Dövlət Neft Fondu 1999-cu ildə təsis olunub.
İyunun 3-nə olan rəsmi məzənnə 0,7893 AZN/USD təşkil edir.
