Azərbaycan, Bakı, 12 sentyabr /Trend, müxbir E.İsmayılov/
Avrasiya neft nəqliyyatı dəhlizi layihəsi, həmçinin onun iştirakçıları arasında hökumətlərarası sazişin imzalanması məsələsi Aİ-nin "Şərq Tərəfdaşlığı" proqramının iştirakçısı ölkələrinin rəhbərləri sammitində müzakirə edilə bilər. Bu barədə Trend-ə bazar ertəsi telefonla "Sarmatia"nın baş direktoru Sergey Skripka deyib.
Sammit sentyabrın 29-30-da Varşavada keçiriləcək.
Layihənin tərkib hissəsi Odessa-Brodı boru kəmərinin ilkin olaraq Polşanın Plosk, sonra isə Qdanska qədər tikintisinin davam etdirilməsidir.
Baş direktorun sözlərinə görə, hökumətlərarası sazişin mətni artıq hazırdır və hökumətlərarası səviyyədə bu məsələyə dair danışıqların aparılmasını gözləmək lazımdır.
"Hökumətlərarası saziş layihəsini Ukrayna tərəfi "Sarmatia" ilə birlikdə hazırlayıb, hazırda biz danışıqların aparılmasını gözləyirik. Sentyabrın sonunda "Şərq Tərəfdaşlığı" proqramının iştirakçı ölkə başçılarının sammiti keçiriləcək və biz ümid edirik ki, bu məsələlər həmin sammitdə müzakirə olunacaq", - Skripka deyib.
"Sarmatia" şirkəti "Ukrtransnafta" ASC və Polşanın "PERN Przyjazn" şirkətləri tərəfindən 2004-cü il iyulun 12-də, Odessa-Brodı neft kəmərinin Polşanın Plosk şəhərinədək layihələşdirilməsi və tikilib başa çatdırılması üçün sərmayələrin cəlb edilməsi məqsədilə yaradılıb.
"Sarmatia"nın iştirakçıları ARDNŞ (Azərbaycan Respublikası Dövlət Neft Şirkəti), Gürcüstanın "Georgian Oil and Gas Corporation Ltd." (GOGC), Ukraynanın "Ukrtransnafta", Polşanın "Przedsiebiorstwo Eksploatacji Rurociagow Naftowych Przyjazn S.A." və Litvanın "AB Klaipedos Nafta" şirkətləridir. Əsas iştirakçıların hər birinin payı 24,75 faiz, Litva şirkətinin payı isə bir faiz təşkil edir.
