Azərbaycan, Bakı, 11 noyabr /Trend, müxbir E.İsmayılov/
Azərbaycan Qara dəniz dairəvi enerji sistemi vasitəsilə Macarıstana elektrik enerjisi tədarük etməyə hazırdır. Trend-in məlumatına görə, bu barədə cümə günü Azərbaycan-Macarıstan iqtisadi əməkdaşlıq üzrə hökumətlərarası komissiyasının ikinci iclasının yekunları üzrə imzalanan protokolun mətnində deyilir.
Sənəddə deyilir ki, bu təklif Azərbaycan-Gürcüstan-Türkiyə enerji dəhlizinin ("Enerji körpüsü") yaradılması nəzərə alınmaqla irəli sürülüb.
2011-ci ilin sonuna qədər "Azərenerji" SC "Enerji körpüsü" layihəsi çərçivəsində Mingəçevirdən Azərbaycanın Gürcüstan ilə sərhədlərinə qədər yüksəkvoltlu elektrikötürücü xətlərin yenidən qurulmasını başa çatdıracaq. Artıq 2012-ci ilin mayından etibarən Azərbaycandan Gürcüstan və Türkiyə istiqamətlərində elektrik enerjisi ixracatının texniki imkanı yaranacaq.
Ötən il Azərbaycan, Gürcüstan və Türkiyə enerji körpüsü layihəsinə dəstək çərçivəsində qarşılıqlı anlaşma memorandumu imzalayıblar.
Azərbaycan, Gürcüstan və Türkiyənin birgə həyata keçirdiyi "Enerji körpüsü" (Power Bridge) layihəsini ABŞ-ın Beynəlxalq İnkişaf Agentliyi (USAID) maliyyələşdirir.
USAID və ABŞ-ın Enerji Assosiasiyası birgə maliyyə və texniki yardımı həyata keçirirlər. Onlar "Azərenerji", "Gürcüstan dövlət enerji sistemi" və Türkiyənin Elektrik Enerjisi Ticarəti üzrə Dövlət Şirkəti (TETAS) ilə birgə yüksəkgərginlikli regional şəbəkə modelini hazırlayırlar.