Azərbaycan, Bakı, 23 yanvar / Trend müxbir E.İsmayılov/
Azərbaycanda hava şəraitinin pisləşməsi və havanın temperaturunun aşağı düşməsi ilə əlaqədar hazırda qazın sutkalıq verilişi 22,5 milyon kubmetrə yaxın təşkil edir. Trend-in məlumatına görə, bu barədə bazar ertəsi ARDNŞ-nin (Azərbaycan Respublikası Dövlət Neft Şirkəti) "Azəriqaz" İstehsalat Birliyinin məlumatında deyilir.
İB-dən deyildiyi kimi, o cümlədən Bakıya sutka ərzində qazın verilməsi 12,2 milyon kubmetrdən 13,5 milyon kubmetrə qədər artırılıb. Regionlarda qazın verilişi 8,2 milyon kubmetrdən 9 milyon kubmetrədək artırılıb.
Azərbaycanda tədarük olunan qazın əhəmiyyətli hissəsi paytaxtın payına düşür.
"Havaların soyuması ilə əlaqədar ölkə üzrə qazın verilməsi artırılıb, həmçinin təkcə Bakıda bu, sutkada 1,3 milyon kubmetr artırılıb", - "Azəriqaz"dan deyiblər.
Azərbaycan ərazisində qazın nəqli və paylanması məsələləri ilə "Azəriqaz" İB məşğul olur.