Azərbaycan, Bakı, 6 iyul /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) və "Statoil" Abşeron yarımadasının şımal-qərbindəki dayaz sulu ərazidə seysmik məlumatların işlənməsini həyata keçirəcəklər. Bu barədə cümə günü Trend-ə ARDNŞ-dəki mənbə bildirib.
ARDNŞ və Norveçin "Statoil" şirkəti birgə tədqiqat müqaviləsi imzalayıblar. "Statoil"dən cümə günü Trend-ə verilən məlumata görə, tədqiqat Abşeron yarımadasının şimal-qərbindəki dayaz sulu ərazidə geoloji-geofiziki məlumatların dəyərləndirilməsinə yönəldiləcək.
Mənbənin sözlərinə görə, işlər "Şimal Abşeron Dəniz", "Şimal-qərbi Abşeron keçid" və Qubanın sahilyanı zolağını əhatə edəcək.
Birgə işlər ərazidə əldə edilən ikiölüçülü və üçölçülü seysmik məlumatların işlənməsi və interpretasiyasının keçirilməsini nəzərdə tutur.
"İl ərzində məlumatların işlənməsindən sonra onların interpretasiyası həyata keçiriləcək. Ümumilikdə, işlər iki ilə yaxın müddətdə aparılacaq", - mənbə qeyd edib.
