Azərbaycan, Bakı, 6 dekabr /Trend, müxbir A.Axundov/
İtaliya TAP qaz kəməri (Transadriatik boru kəməri) layihəsinin həyata keçirilməsinə maraq göstərir. Trend-in məlumatına görə, bu barədə cümə axşamı jurnalistlərə İtaliyanın Azərbaycandakı səfiri Mario Baldi deyib.
"Biz TAP-ın həyata keçirilməsinə maraq göstəririk, çünki bu, Azərbaycan qazını İtaliyaya birbaşa tədarük etməyə imkan verən yeganə layihədir", - Baldi qeyd edib.
Səfirin sözlərinə görə, bununla yanaşı, İtaliya Xəzər regionundan təbii resursların Avropaya nəqli üçün yol açacaq "Cənubi qaz dəhlizi"nin yaradılmasını dəstəkləyir.
"Biz TAP-ın tikintisinin 2017-2018-ci illərdə başa çatacağını gözləyirik", - Baldi bildirib.