Azərbaycan, Bakı, 19 sentyabr /Trend, müxbir E.İsmayılov/
Albaniya ARDNŞ və maraq göstərən digər şirkətlərin ölkədə zəruri qaz infrastrukturu qurmalarında maraqlıdır. Burada məqsəd Albaniyanın almaq niyyətində olduğu Azərbaycan qazını ölkə ərazisindəki istehlakçılara tədarük etməkdir. Trend-in məlumatına görə, bu barədə cümə axşamı jurnalistlərə ARDNŞ-nin yüksəkvəzifəli nümayəndəsi deyib.
Onun sözlərinə görə, hazırda Albaniya ərazisində paylayıcı qaz sistemi mövcud deyil: "Buna baxmayaraq, Azərbaycan qazı bu ölkə üzrə nəql ediləcək dövrə qədər (2019-cu il) paylayıcı sistem yaradılacaq".
ARDNŞ nümayəndəsi qeyd edib ki, Albaniya Azərbaycan qazını almaq niyyətindədir, "Şahdəniz" konsorsiumu isə bu ölkəyə qaz satışında maraqlıdır.
Onun sözlərinə görə, bu, layihə iştirakçıları üçün kommersiya cəhətdən səmərəli olması ilə izah edilir.
