Azərbaycan, Bakı, 5 mart /Trend, müxbir E.İsmayılov/
2013-cü ildə Azərbaycanın enerji sisteminin gücü 12,9 faiz artaraq 7,1 min meqavata çatıb. Trend-in məlumatına görə, bu barədə Nazirlər Kabinetinin 2013-cü ilin yekunları ilə bağlı Milli Məclisə təqdim etdiyi hesabatda qeyd olunub.
Hesabata əsasən, enerji sisteminin qeyd edilən gücü 22-24 milyard kilovat-saat elektrik enerjisi hasil etməyə və 2,1 milyard kilovat-saat həcmində elektrik enerjisini ixrac etməyə imkan verir.
Hesabatda deyilir ki, ötən il elektrik enerjisi kompleksinin inkişafı ölkədə aparılan iqtisadi islahatlar nəticəsində yüksək templə davam etdirilib ki, bu da ölkənin enerji təhlükəsizliyini daha da möhkəmləndirməyə imkan yaradıb.
Ötən il Azərbaycanda ümumilikdə 23,2 milyard kilovat-saat elektrik enerjisi istehsal olunub. Bu həcmdən təqribən 20,8 milyard kilovat-saatı "Azərenerji" ASC-nin, 784,4 milyon kilovat-saatı Naxçıvan Muxtar Respublikasının Dövlət Energetika Agentliyinin, təqribən 1,67 milyard kilovat-saatı müstəqil elektrik stansiyalarının payına düşüb. 1,4 milyon kilovat-saat elektrik enerjisi isə külək enerjisinin regenerasiyası hesabına təmin edilib.