Azərbaycan, Bakı, 11 mart /Trend, müxbir E.İsmayılov/
2014-cü ilin fevralında PSA müqaviləsi çərçivəsində işlənilən "Bahar" və "Qum Dəniz" dəniz yataqları blokunda neft hasilatının orta sutkalıq həcmi 26,7 faiz artaraq sutkada 8798 barelə çatıb. Trend-in məlumatına görə, bu barədə çərşənbə axşamı "Greenfields Petroleum Corporation" tərəfindən yayılan xəbərdə deyilir.
Вu ilin yanvarında hasilatın həcmi sutkada 6944 barel təşkil edib.
"Bahar" dəniz yatağının operatoru "Greenfields Petroleum Corporation" "Bahar" və "Qum Dəniz" dəniz yataqları blokunda kəşfiyyat, bərpa, işlənmə və hasilat üzrə PSA tipli müqavilə çərçivəsində "Bahar Energy"nin şərikidir, eləcə də onun texniki məsləhətçisi kimi çıxış edir.
Məlumatda deyilir ki, müqavilə sahəsində küləkli hava şəraiti ilə əlaqədar uzanan üçölçülü seysmik tədqiqatlar davam etdiriləcək. Üçölçülü tədqiqatlar prosesinin mövsümlə əlaqədar hava şəraitinin yaxşılaşmasından sonra davam etdirilməsi gözlənilir.
2014-cü ildə işlər çərçivəsində səkkiz yeni quyunun qazılması planlaşdırılır.
ARDNŞ (Azərbaycan Respublikası Dövlət Neft Şirkəti) və "Bahar Energy" arasında kəşfiyyat, bərpa, işlənmə və hasilat üzrə PSA tipli müqavilə 2009-cu ildə imzalanıb.