Azərbaycan, Bakı, 29 oktyabr /Trend, müxbir Emil İsmayılov/
Norveçin "Statoil" şirkətinin Azərbaycanın "Şahdəniz" qaz-kondensat yatağının işlənməsi layihəsindən çıxması gözlənilməz olmadı. Bu barədə Trend-ə ARDNŞ-nin (Azərbaycan Respublikası Dövlət Neft Şirkəti) yüksəkvəzifəli nümayəndəsi deyib.
Oktyabrın 13-də Norveçin "Statoil" şirkətinin "Şahdəniz" layihəsindəki 15,5 faizlik iştirak payını və Cənubi Qafqaz qaz kəmərindəki eyni miqdarda payını Malayziyanın "Petronas" şirkətinə satdığı elan edildi. 2015-ci ilin əvvəlində başa çatacağı gözlənilən sövdələşmənin ümumi dəyəri 2,25 milyard dollar təşkil edir.
ARDNŞ nümayəndəsinin sözlərinə görə, Azərbaycanın neft-qaz sektoru ilə bağlı bəzi məsələlər bir çoxları tərəfindən "həddindən artıq siyasiləşdirilmiş" kimi qəbul edilir. Bu vəziyyət [şirkətin layihədən çıxması] dünya təcrübəsində normal hesab edilir: bu halda hər bir şirkət "Statoil" kimi öz prioritetlərini müəyyən edir.
O, qeyd edib ki, şirkət bəzi layihələr üzrə yeni yanaşmalarını elan etdi və qərar yəqin ki, buna əsaslanaraq qəbul edilib.
Ötən il "Statoil" şirkəti "Şahdəniz" layihəsindəki və Cənubi Qafqaz qaz kəmərindəki 10 faizlik iştirak payını ARDNŞ və Britaniyanın BP şirkətinə 1,45 milyard dollara satmışdı.
