Azərbaycan, Bakı, 5 noyabr /Trend, müxbir Emil İsmayılov/
"SOCAR Energy Turkey" 2023-cü ilə kimi Türkiyənin iri sənaye şirkətinə çevrilmək niyyətindədir. Trend xəbər verir ki, bu barədə çərşənbə günü ikinci OGPC forumu zamanı (Azərbaycanda yeni neft və qaz emalı və neft-kimya məhsullarının istehsalı kompleksinin yaradılması layihəsi) "SOCAR Energy Turkey"-in rəhbəri Kənan Yavuz bildirib.
Onun sözlərinə görə, 2023-cü ilədək şirkətin ümumi dövriyyəsi 30 milyard dollar təşkil edəcək, 2018-ci ildə bu göstəricinin 15 milyard dollar səviyyəsində olacağı gözlənilir: "Hazırda şirkət Türkiyədə bir sıra iri layihələr həyata keçirir. Onların arasında neft emalı zavodu, konteyner limanı və elektrik enerjisi istehsalı müəssisələri var".
Yavuzun qeyd etdiyi kimi, yeni "Star" Neft Emalı Zavodunun 2018-ci ilin əvvəlində işə salınması gözlənilir. Bu müəssisənin işə salınması ilə şirkət Türkiyədə ikinci iri sənaye müəssisəsinə çevriləcək.
ARDNŞ 2013-cü ilin mayında "Star" Neft Emalı Zavodunun tikintisi üzrə şirkətlərin konsorsiumu ilə EPC müqavilə (Engineering, procurement and construction) imzalayıb. NEZ -nin tikintisi üzrə tenderin qalibi "Tecnicas Reunidas SA", "Saipem SpA", "GS Engineering & Construction Corp" və "Itochu" şirkətlər alyansı olub.
