Bakı. Trend:
Yunanıstan-Bolqarıstan interkonnektorunun (IGB) operatoru ICGB şirkəti infrastruktur imkanlarının genişləndirilməsinin təfərrüatlarını paylaşdı.
Bu barədə Trend şirkətə istinadən məlumat verib.
İlkin texniki araşdırmalara görə, ICGB 2025-ci ilin dördüncü rübündən Stara-Zaqoradakı birləşmə nöqtəsində və 2026-cı ilin dördüncü rübündən Komotini əlaqə nöqtəsində gücün ildə 3 milyard kubmetrdən 5 milyard kubmetrə qədər artacağını gözləyir.
Qeyd edək ki, Yunanıstan-Bolqarıstan interkonnektoru kommersiya tədarüklərinə 1 oktyabr 2022-ci ildə başlayıb.
Bu konnektor vasitəsilə Bolqarıstana qaz tədarükünün müqavilə həcmi ildə 1 milyard kubmetrdir. IGB-nin ümumi gücü ildə 5 milyard kubmetrə qədər genişləndirilməsi imkanı ilə 3 milyard kubmetrdir.
Yunanıstan-Bolqarıstan interkonnektorunun qaz ötürmə qabiliyyətinin 5 milyard kubmetrdən çox artırılması əlavə qaz kəmərinin tikintisi hesabına mümkündür.