Almaniyanın KfW bankının kreditləşdirdiyi "Ötürücü sistemlərin reabilitasiya proqramı" layihəsi çərçivəsində yeni avadanlığın quraşdırılması işləri aparılır.
Bu barədə Trend agentliyinə Azərenerji SC-də bildirilib.Əsasən "İmişli", "Yevlax", "Yaşma", "Xırdalan", "Maştağa" və digər yarımstansyialarda açarların dəyişdirilməsi üzrə işlər aparılır.
SC-də qeyd olunub ki, Siemens və Azərenerji SC sistemə yeni avadanlığın qoşulması zamanı elektrik enerjisinin kəsilməsi cədvəlinin işlənib-hazırlanması üzərində işləyir.
Bu layihənin gerçəkləşdirilməsi "2005-2015-ci illərdə Azərbaycan Respublikasının yanacaq-energetika kompleksinin inkişafı üzrə Dövlət proqramı"nda nəzərdə tutulub.
Layihə Almaniyanın KfW inkişaf bankının illik 0,75% dərəcə ilə 10 il güzəştlə 40 il müddətinə ayırdığı 15,338 mln. avro hesabına maliyyələşdirilir.
