Azərbaycan Dövlət Neft şirkətinin neft və qaz hasilatı üzrə "Azneft" istehsalat Birliyi "Qərbi Abşeron" strukturunun cənub hissəsində qiymətləndirici və öncə qazma quyularının qazılmasını başa çatdırır. Bu barədə Trend ə AR DNŞ-dən məlumat verilib.
Layihə dərinliyi 750 m olan qiymətləndirici quyunun qazılması "Abşeron" qurğusu, öncə qazma quyusunun isə - "Xəzər" qazma qurğusu vasitəsilə həyata keçirilir. Bu quyunun layihə dərinliyi 780 m-dir.
AR DNŞ-də hesab edirlər ki, bu yatağın işlənib hazırlanması səmərəlidir. Bu, onunla izah olunur ki, yataq sahil, o cümlədən neftin nəqli üzrə mövcud kommunikasiyaların yaxınlığında yerləşir. Hazırda yatağın bu hissəsində ehtiyatların kontura alınması və qiymətləndirilməsi prosesi gedir. Quyuların dərinliyi 800-1000 m-dir.
İlin sonunadək AR DNŞ "Qərbi Abşeron" yatağının cənub hissəsində sahildən 40-50 m aralıda sahil zonasında hasilat platforması qurmaq niyyətindədir. Mütəxəssislərin qiymətləndirməsinə görə, yataqda təxminən 1,5 mln ton çıxarıla bilən şərti yanacaq ehtiyatı var.
