"Cənub-Qərbi Qobustan" müqavilə sahəsini işləyib-hazırlayan Gobustan Operating Company (GOC) Azərbaycan Dövlət Neft Şirkətinin sərbəst kommersiya qazının tədarük olunduğu quyuların sayını artırıb. Şirkətdən Trend ə verilən məlumata görə, GOC 3 quyudan sutkada 40-45 min m3 (ayda 1,3 mln m3) qaz tədarük edir.
Qazın qiyməti $1.29/1 mln BTU təşkil edir ($1.29/1 mln BTU - $46/1 min m3). Qaz "Cənub-Qərbi Qobustan" müqavilə sahəsinə daxil olan "Duvannı" yatağındakı quyulardan tədarük olunur.
ARDNŞ nümayəndəsinin sözlərinə görə, payızadək qaz paylayıcı şəbəkəyə 4 və 5-ci quyuların qoşulması nəzərdə tutulur ki, bu da yanacaq tədarükünün 350 m3-dək artmasına imkan verəcək.
Neft-qaz üzrə müstəqil məsləhətçi Ryder Scott-un məlumatına görə, yatağın ehtiyatları 51,6 mln barel neft ekvivalentinə, ümumi ehtiyatlar isə 135,4 mln barelə bərabərdir. Mövcud neft ehtiyatları 15,8 mln barel, qaz ehtiyatları isə 214,65 mln m3 təşkil edir. Ümumi neft və qaz ehtiyatları (mövcud və ola bilən) isə 66,6 mln barel və 412,933 mln m3-ə bərabərdir.
