Azərbaycanın Azəri Light növlü nefti ilə yüklənmiş birinci tanker Türkiyənin Ceyhan limanından 28 may-3 iyunda göndəriləcək. ARDNŞ-dən Trend ə verilən məlumata görə, partiyanın həcmi 80 min ton təşkil edəcək.
"Hazırda Azərbaycan neftinin Ceyhan limanından iyunda yüklənmə cədvəli müəyyən edilir. İyunda bir neçə tankerin yüklənəcəyi gözlənilir", - deyə ARDNŞ-dən bildirilib.
2005-ci ilin mayından 2006-cı ilin mayınadək BTC boru kəmərinə 1 mln. 083 min ton (8,072 mln. bar) Azeri Light növlü neft vurulub. Boru kəmərinin doldurulması üçün 10 mln. barel lazımdır.
2005-ci ilin sentyabrında Ceyhan limanına Azeri Light növlü birinci neft nəql olunub vətankerdən neft anbarlarından birinə yüklənib. Partiya terminalın sınaqdan keçirilməsi və BTC-nin bir hissəsinin doldurulması üçün Ceyhana Gürcüstanın Supsa limanından nəql olunub. BTC Co tərəfindən 600 min barel həcmində neft partiyası "Azəri-Çıraq-Günəşli" yatağından neft hasil edən ABƏŞ üzrə tərəfdaşlardan alınıb. Partiyanın dəyəri Azəri-Light növlü neftin orta aylıq Platts məzənnəsi əsasında hesablanıb.