"Şahdəniz" layihəsi çərçivəsində sualtı boru kəmərlərinin sınaqdan keçirilməsi avqustun ortalarında başlayacaq
"Şahdəniz" qaz-kondensat yatağının işlənməsi layihəsinin operatoru - BP Azerbaijan şirkəti bu ayın ortalarında həmin layihə çərçivəsində sualtı boru kəmərlərini, həmçinin Səngəçaldakı avadanlığı sınaqdan keçirməyə başlamaq niyyətindədir. Bu barədə Trend ə şirkətdən xəbər veriblər. İşlər tamamlandıqdan sonra Gürcüstan ərazisində SCP boru kəmərinin təzyiq altında sınaqdan keçirilməsi davam etdiriləcək.
Hazırda qaz hasilatı üçün nəzərdə tutulmuş TPG 500 platformasında işə salma işləri davam etdirilir. Bütün işlər qrafikə əsasən gedir və sentyabrın ortalarında başa çatacaq.
TPG 500 platforması qazma, hasilat və 120 nəfərlik yaşayış blokundan ibarət özüqalxan qurğudur. Onun ümumi kütləsi 32 min tondur (üst tikililəri 22 min ton, istinad və əsasları 10 min ton). Platformanın qazma avadanlığı 3 km-dən çox kənara çıxma ilə 7 km-dən artıq uzunluqda qazıntı işləri aparmağa imkan verir. Platformanın hasilat qurğuları gündə təxminən 1 milyard kub fut (28,5 milyon kub metr) qaz və 60 min barel (8 min ton) kondensat emal etməyə imkan verir. Qaz və kondensat yataqdan Səngəçal terminalına sualtı boru kəmərləri vasitəsilə nəql ediləcək.
Boru çəkmə işlərinin tamamlanması ilə dəniz boru kəmərləri təmizləmə və sınaq proseslərindən keçiblər. Avqust ayı ərzində "AÇG" yatağından səmt qazının köməyi ilə boru kəmərindən su boşaldılacaq və bu, sentyabr ayında "Şahdəniz" yatağından ilk qazı qəbul etməyə imkan yaradacaq.
