"Şahdəniz" qaz-kondensat yatağının işlənmə layihəsinin operatoru "BP-Azərbaycan" şirkəti avqustun sonunda bu layihə çərçivəsində sualtı boru kəmərlərinin, eləcə də Səngəçal terminalındakı avadanlığın sınaqdan keçirilmə işini tamamlayacaq. Bu barədə Trend ə şirkətdən xəbər verilib. Bu işlər tamamlandıqdan sonra Gürcüstan ərazisində SCP boru kəmərinin təzyiq altında sınaqdan keçirilməsi davam etdiriləcək.
Hazırda qaz hasilatı üçün nəzərdə tutulmuş TPG 500 platformasında sazlama işləri həlledici mərhələdədir. Bütün işlər qrafik üzrə gedir və bu ilin sentyabr ayının ortalarında tamamlanacaq.
TPG 500 platforması qazma, hasilat və 120 nəfərlik yaşayış blokundan ibarət özüqalxan qurğudur. Onun ümumi çəkisi 32 min tondur (üst tikililər - 22 min ton, istinad və özülləri 10 min ton). Platformanın qazma avadanlığı 7 km-dən çox uzunluqda və 3 km-dən çox maililiyi olan qazıntı aparmağa imkan verir. Platformanın hasilat qurğusu gündə təxminən 1 milyard kub fut (18,5 milyon kubmetr) qaz və 60 min barel (8 min ton) kondensat emal etməyə imkan verir. Yataqdakı qaz və kondensat sualtı boru kəmərləri vasitəsilə Səngəçal terminalına nəql olunacaq.
