Azərbaycan Dövlət Neft Şirkəti (ARDNŞ) öz neftinin Bakı-Tbilisi-Ceyhan (BTC) boru kəməri ilə nəqlinə görə BTC Co şirkətindən xüsusi güzəştli tarif almaq istəyir. ARDNŞ nümayəndəsinin Trend ə verdiyi xəbərə görə, artıq şiper rolunda çıxış edəcək Dövlət Neft Şirkəti üçün tarif öz yataqlarından BTC boru kəməri ilə neft göndərərkən BTC layihələrinin iştirakçısı üçün olan qiymətdən yüksək olmayacaq.
"O, (tarif) bütün şiperlər üçün güzəştli olmayacaq, lakin biz hesab edirik ki, ARDNŞ üçün tarif güzəştli olacaq", - deyə ARDNŞ nümayəndəsi bildirib.
Qazaxıstan və Türkmənistandan yük göndərənlər üçün tarifə gəlincə, ARDNŞ nümayəndəsi bildirib ki, bu cür şiperlər üçün neft nəqli üzrə kommersiya tarifi olacaq.
"Lakin BTC boru kəməri ilə neft nəqlinin dəyəri neftin dəmir yolu ilə nəqlinin qiymətindən cəlbedici olmalıdır", - deyə ARDNŞ nümayəndəsi bildirib.
Onun sözlərinə görə, ARDNŞ-in öz neftinin BTC boru kəməri ilə nəqli üçün Dövlət Neft Şirkəti və BTC Co arasında ayrıca nəqliyyat sazişi imzalanacaq.
Hazırda ARDNŞ neftinin öz yataqlarından Bakı-Ceyhan üzrə nəql olunan həcmi ilə bağlı məsələ məlum deyil. "Əgər BTC Co boru kəmərinin daşıma qabiliyyətini artıra bilsə, biz nəqlin iqtisadi səmərəliliyini nəzərə almaqla, maksimal həcmdə neft göndərməyə çalışacağıq", - deyə ARDNŞ nümayəndəsi qeyd edib.