Azərbaycan Dövlət Neft Şirkəti (ARDNŞ) və Rusiyanın "RussNeft" şirkəti Azərbaycanın "Hövsan-Zığ" quru yataqları blokunun işlənilməsinə dair PSA tipli müqavilənin bağlanması perspektivləri çərçivəsində texniki şərtləri və əsas kommersiya prinsiplərinin razılaşdırılmasını başa çatdırıblar. Bu barədə Trend ə ARDNŞ-dən xəbər verilib.
ARDNŞ təmsilçisinin sözlərinə görə, hazırda PSA müqaviləsinin mətni hazırlanır. "Müqavilə hazırlandıqca tərəflər onun bəndlərini razılaşdırırlar. Yəqin ki, ilin sona kimi bu işlər başa çatacaq", - deyə ARDNŞ-dən bildiriblər.
"RussNeft" "Hövsan-Zığ" yataqlarının ARDNŞ ilə birgə işlənilməsi çərçivəsində ekoloji problemlərin həllini öz üzərinə götürməyə hazır olduğunu bildirib.
Bir qədər əvvəl "Hövsan-Zığ" yataqlarının işlənilməsi üzrə PSA tipli müqavilə Rusiyann digər şirkəti - "LUKoyl" ilə bağlanmışdı. Lakin sonradan tərəflər müqaviləni ləğv etdilər.
Abşeron yarımadasındakı bu yatağın məhsuldar layları 1470-2800 metr dərinlikdə yerləşir. Yataq 1935-ci ildən istismar olunur.
"RussNeft" ASC 2002-ci ilin sentyabr ayında yaradılıb. Bu gün şirkətin illik neft hasilatı 17 mln. tondan çoxdur. Çıxarılan ehtiyatlar isə 630 mln. tondan artıqdır. 30 hasilat aktivləri, 3 neft emalı zavodu, 1 nəqliyyat müəssisəsi və 300 yanacaqdoldurma kompleksi "RussNeft"in balansındadır.