Azərbaycan "Şahdəniz" yatağından əldə edilən qazın üç ölkə arasında (Azərbaycan, Türkiyə, Gürcüstan) paylanması mexanizmi üzərində işin davam etdirilməsinin vacibliyi barədə birldirir.
Trend xəbər verir ki, Azərbaycanın sənaye və energetika naziri Natiq Əliyev çərşənbə günü bildirib: "Kompensasiyaların necə həyata keçiriləcəyini aydınlaşdırmaq lazımdır. Burada bəzi məsələlər və problemlər mövcuddur, ona görə bu layihə üzərində işi davam etdirmək lazımdır".
Onun sözlərinə görə, "Şahdəniz" yatağından qaz paylanması ilə bağlı Azərbaycan, Gürcüstan və Türkiyə energetika nazirlərinin görüş keçirməsinə hazırda ehtiyac yoxdur.
O deyib: "Bu məsələ ilə bağlı ilkin razılaşma var. Lakin bir dəfə də qiymətləndirmə aparmaq lazım olacaq, bunun nəticələrinə görə yeni görüşün keçirilməsinə ehtiyac yarana bilər".
Nazir bildirib ki, Gürcüstan prezidenti Mixail Saakşvilinin Türkiyəyə səfəri gedişində Gürcüstan və Türkiyə energetika nazirləri Niki Qilauri və Hilmi Gülərin görüşü keçirilib və bu görüşdə ilkin razılaşma əldə edilib ki, Türkiyə "Şahdəniz" yatağında öz qaz həcminin bir hissəsini Gürcüstana verəcək.
