Azərbaycan, Bakı/ Trend müxbir S.Əliyev/ Azərbaycan Beynəlxalq Əməliyyat Şirkəti üzrə tərəfdaşlar Bakı-Novorossiysk kəməri üzrə operatorluqdan imtina etmək barədə qərar qəbul ediblər. Bunu çərşənbə günü mətbuat konfransında BP Azerbaijan şirkətinin quruda əməliyyatlar üzrə vitse-prezidenti Rəşid Cavanşir bildirib.
Hazırda bu boru kəməri ilə Azərbaycan Dövlət Neft Şirkəti (ARDNŞ) neft nəql edir. Kəmərin operatorluğu yaxın zamanlarda ARDNŞ-ə keçəcək.
"Biz hazırda bu məsələ üzrə ARDNŞ-lə danışıqlar aparırıq", - deyə Cavanşir bildirib.
Onun sözlərinə görə, Bakı-Tiflis-Ceyhan ixrac neft kəmərinin mövcud olması səbəbindən ABƏŞ-in başqa boru kəmərinə ehtiyacı yoxdur. Bu boru kəməri ilə ABƏŞ-in "Azəri-Çıraq-Günəşli" yatağında hasil etdiyi yüngül neft ixrac olunur.