Azərbaycan, Bakı/ Trend müxbir V.Şərifov/ Azərbaycan Dövlət Neft Şirkəti (ARDNŞ) Bakı-Novorossiysk boru kəmərinin operatorluğunun alınması prosesini tənzimləmək üçün xüsusi işçi qrupu yaradıb. Bu barədə cümə axşamı ARDNŞ-dən bildirilib.
1997-ci ildən 5 mln. ton gücündə olan Bakı-Novorossiysk kəmərinin operatoru olan Azərbaycan Beynəlxalq Əməliyyat Şirkəti (ABƏŞ) onun istismarından gücü 50 mln. ton olan Bakı-Tiflis-Ceyhan neft kəmərinin xeyrinə imtina edib. BTC kəməri ilə ABƏŞ-in "Azəri-Çıraq-Günəşli" yatağından hasil etdiyi yüngül neft nəql olunur.
"Boru kəmərinin ARDNŞ-in balansına verilməsi prosesində, ABƏŞ tərəfindən Bakı-Novorossiysk kəmərinin istismarı üçün xüsusi hazırladığı heyət də daxil olmaqla, bir çox suallar hyaranır",- deyə ARDNŞ-dən bildiriblər.
Neftin Bakı-Novorossiysk kəmərilə ötürülməsi üçün tarif bir ton üçün 15,67 dolardır. Bu vəsaiti ABƏŞ Rusiyanın "Transneft" şirkətinə ödəyir.
ARDNŞ-də hesab edirlər ki, Dövlət Neft Şirkəti ilin sonuna qədər kəmərin operatorluğunu ala bilər. 1997-ci ildən Bakı-Novorossiysk kəmərinin operatorunun ABƏŞ olmasına baxmayaraq paralel olaraq ARDNŞ öz yataqlarında hasil etdiyi və quruda işləyən BM və xarici şirkətlərin hasil etdiyi nefti bu kəmərlə ixrac edirdi.