Bakı. Trend:
İqlim dəyişmələri ilə mübarizənin maliyyələşdirilməsini sürətləndirmək lazımdır.
Trend xəbər verir ki, bunu BMT-nin İqlim Dəyişmələri üzrə Çərçivə Konvensiyasının (UNFCCC) icraçı katibi Saymon Stil Brukinqs İnstitutunun Qlobal İqtisadiyyat və İnkişaf Proqramının onlayn tədbirində çıxış edərkən bildirib.
Saymon Stil çıxışı zamanı son 10 ildə əldə edilən böyük irəliləyişlərə toxunub.
O qeyd edib ki, keçən il dünya üzrə iqlim dəyişikliyinə qarşı mübarizə tədbirlərinə bir trilyon ABŞ dollarından çox sərmayə qoyulub, bu isə 10 il əvvəlki bir neçə yüz milyard dollarlıq göstəricidən əhəmiyyətli artımdır.
S.Stil, İqtisadi Əməkdaşlıq və İnkişaf Təşkilatının (OECD) məlumatlarına əsasən, inkişaf etmiş ölkələrin 2022-ci ildə inkişaf etməkdə olan ölkələrə 100 milyard dollardan çox iqlim maliyyəsi ayırdığını vurğulayıb. Lakin o bildirib ki, əldə edilən irəliləyişə baxmayaraq, bu kifayət deyil və maliyyənin daha da artırılmasına ehtiyac var.
O qeyd edib ki, hazırkı qlobal transformasiya bərabərsizliklərə gətirib çıxarır və bu bərabərsizlik aradan qaldırılmasa, iqtisadiyyatın bütün sahələri ciddi zərər görə bilər. Bunu aradan qaldırmaq üçün ölkələrin karbon tullantılarını azaltmaq və iqlim dəyişikliyinə uyğunlaşma istiqamətində daha çox maliyyə vəsaitinə ehtiyacı var.
Saymon Stil əlavə edib ki, iqlim dəyişikliyinə qarşı tədbirlərin sürətləndirilməsi üçün trilyonlarla dollarlıq sərmayələr lazımdır və bu investisiyalar qlobal iqtisadiyyatın qorunması üçün həyati əhəmiyyət kəsb edir.
O həmçinin qeyd edib ki, Dünya Bankının illik konfransı bu prosesin gücləndirilməsi üçün əhəmiyyətli bir fürsət ola bilər. O vurğulayıb ki, Çoxşaxəli İnkişaf Bankları bu transformasiyanın mərkəzində dayanır və Dünya Bankı artıq iqlim sahəsində güzəştli kreditləşməni genişləndirmək planlarını açıqlayıb.
Bundan əlavə, Saymon Stil bir çox inkişaf etməkdə olan ölkələrin borc böhranları ilə üzləşdiyini və bu vəziyyətin onların iqlim proqramlarına investisiya qoymaq imkanlarını məhdudlaşdırdığını vurğulayıb. O, borc yüklərini azaltmaq və yeni maliyyə mənbələri tapmaq üçün qlobal əməkdaşlığın vacibliyini də qeyd edib.