Bakı. Trend:
OPEC COP29-da Bakıda öz pavilyonunu təqdim edəcək.
Trend xəbər verir ki, bu barədə Neft İxrac edən Ölkələr Təşkilatının (OPEC) Baş katibi Haysam Əl-Qays Vyanada keçirilən iqlim dəyişikliyi üzrə 26-cı koordinasiya iclasının iştirakçılarına müraciətində bildirib.
O, iqlim maliyyələşdirilməsi sahəsində yeni kollektiv hədəfinin əhəmiyyətini vurğulayıb.
"OPEC Katibliyi iqlim müzakirələri və proseslərini izləməyə davam edəcək, nümayəndə heyətləri ilə sıx əlaqədə olacaq. Bundan əlavə, COP29-da OPEC pavilyonu təqdim olunacaq, burada təşkilat emissiyaların azaldılması, enerji təhlükəsizliyinin təmin edilməsi və neftin hamı üçün dayanıqlı enerji əldə edilməsində rolu barədə fikirlərini bölüşəcək", — o qeyd edib.
OPEC-in Baş katibi, həmçinin, Azərbaycanı COP29-un yeni sədri olaraq birgə və inklüziv yanaşmaya görə minnətdarlığını ifadə edib.
Qeyd edək ki, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.
Birləşmiş Millətlər Təşkilatının İqlim Dəyişmələri üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan "Tərəflərin Konfransı" mənasını verir.
Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.