Azərbaycan, Bakı, 28 aprel / Trend , müxbir S.Babayeva/ Yayda 2009-2012-ci illər "Elektron Azərbaycan" dövlət proqramının ilkin variantı müzakirə olunacaq. Bu barədə bazar ertəsi Azərbaycan Rabitə və İnformasiya Texnologiyaları Nazirliyinin informasiya cəmiyyətinin inkişafı şöbəsinin rəhbəri Rüfət Gülməmmədov məlumat verib.
"İki ay ərzində biz layihənin müzakirələrə çıxarılmasını planlaşdırırıq" - deyə o bildirib.
Dövlət proqramının davam etdirilməsi barədə qərar martın sonlarında nazir müavini İltimas Məmmədovun rəhbərliyi ilə keçirilmiş dövlət proqramının Koordinasiya Şurasının iclasında qəbul olunub.
Proqramda yaxın üç il ərzində Azərbaycanda rabitə və informasiya texnologiyaları sahəsinin inkişaf prioritetləri öz əksini tapacaq.
Azərbaycanda rabitə və informasiya texnologiyalarınin inkişafı üzrə ilk dövlət proqramı ("Elektron Azərbaycan") 2005-ci ilin oktyabr ayında prezident İlham Əliyev tərəfindən təsdiq olunub və 2005-2008-ci illəri əhatə edir.
Dövlət proqramı iqtisadi-struktur islahatları, rabitə və informasiya texnologiyaları sahəsinin genişlənmə və modernləşdirilməsinə, informasiya cəmiyyətinə keçidin təmin olunmasına dair layihələrin hazırlanması və gerçəkləşdirilməsinə istiqamətlənib. "Elektron Azərbaycan" dövlət proqramının gerçəkləşdirilməsi üzrə tədbirlər planına iqtisadi-struktur islahatları, özəlləşdirmə, liberizasiya, nizamlama, texniki modernləşmə, teleradio yayımını təkmilləşdirmə, poçt islahatları daxildir.
