Azərbaycan, Bakı, 17 may/ Trend , müxbir S.Babayeva/Azərbaycan Rabitə Nazirliyinin rəhbəri Əli Abbasovun Malayziyaya səfəri zamanı BMT ilə informasiya-kommunikasiya texnologiyaları sahəsində memorandum imzalanacaq. Bu barədə şənbə günü rabitə və informasiya texnologiyaları nazirinin müavini Elmir Vəlizadə məlumat verib.
"Sənədə həm məsləhətləşmələr, həm də əməli işlər üzrə qarşılıqlı fəaliyyət daxildir" - o bildirib.
Vəlizadə sazişin müddətinin konkret olaraq müəyyən edilmədiyini bildirib. Lakin sənəd qısamüddətli perspektivə hesablanıb.
Bu gün rabitə və informasiya texnologiyaları naziri Abbasov BMT-nin İqtisadi və Sosial Məsələlər üzrə Departamenti (UNDESA-GAİD) nəzdində İnformasiya və Kommunikasiya Texnologiyaları və İnkişaf üzrə Qlobal Alyansın forumunda iştirak etmək üçün Malayziyaya yola düşüb. "Əlaqələndirmə və birləşmə: yenilikçi yolla inkişaf naminə İKT-nin maliyyələşdirilməsi" adlı forum, mayın 18-20-də Malayziyanın paytaxtında - Kuala-Lumpurda keçiriləcək.
Əli Abbasov MDB üzrə regional şəbəkənin sədri kimi, forum çərçivəsində, Azərbaycan və MDB-də İKT sahəsinin inkişafı mövzusunda çıxış edəcək.
Bundan əlavə, forumun birinci günü nazirin "Asiya və Sakit okean ölkələrində, o cümldən də digər inkşaf edən ölkələrdə əlaqələndirmə və birləşdirmə" bölməsində "MDB-də informasiya texnologiyalarının inkişaf tendensiyası və problemləri" mövzusunda çıxışı planlaşdırılıb.
Müəlliflə əlaqə saxlamaq üçün elektron ünvan: [email protected]