Azərbaycan, Bakı, 07 iyun/ Trend , müxbir S.Babayeva/ Azərbaycanda rəqəmsal telekommunikasiya şəbəkəsinin səviyyəsi 79,7 faizə çatır. Bu barədə Azərbaycanın Rabitə və İnformasiya Texnologiyaları Nazirliyinin tənzimləmə şöbəsinin rəhbəri Əliyar Təmirov mayın sonunda İstanbulda keçirilmiş Qaradəniz və Xəzər regionu ölkələrinin üçüncü tənzimləyici konfransında məlumat verib.
Onun sözlərinə görə, Bakıda bu rəqəm 84,8 faiz, kənd yerləri üzrə isə 72,3 faiz təşkil edir.
Fiksasiya edilmiş telefon şəbəkəsinin tutumu 1,427 mln. nömrə təşkil edir. Hər 100 nəfərə 15, paytaxtda isə orta hesabla 33,55 ədəd telefon düşür.
Azərbaycanda İnternet-istifadəçilərin sayı 1 mln.-a çatır, hər 100 nəfərə 12 İnternet-istifadəçi düşür. İnternet klubların sayı 900-ə, qlobal İnternet şəbəkəsinə çıxışın orta sürəti 666 Mb/saniyəyə çatır.
Ölkədə naqilsiz İnternet istifadəçilərinin sayı 18 min nəfər təşkil edir.
2007-ci ildə Azərbaycanın rabitə və informasiya texnologiyaları sektoruna yatırılan sərmayələrin həcmi $235,4 mln., ÜDM-in strukturunda payı - 1,8 faiz, İT gəlirlərdə özəl sektorun payı 78,3 faiz təşkil edib.