Azərbaycan, Bakı, 18 iyul/ Trend / Cisco şirkəti vençur maliyyələşdirmə vasitəsilə MDB məkanında investisiya fəaliyyətinin başladığını elan edib. Şirkətin məlumatında bildirilir ki, sərmayələr Cisco-nun təşəbbüsü ilə Almaz Capital Partners ilə birgə yaradılacaq "Almaz-Kapital/Cisco Fond 1" Fondu vasitəsilə həyata keçriləcək.
Hazırda Fondun əsas kapitalı $60 mln. təşkil edir. Fondun vəsaitləri yüksək texnologiyalar, media sahəsində və telekommunikasiya sektorunda yüksək artım potensialına malik kiçik və orta müəssisələrə yatırılacaq.
Gələcəkdə Cisco birbaşa sərmayələr də həyata keçirməyi planlaşdırır.
Cisco şirkətinin MDB ölkələrində iş üzrə vitse-prezidenti Robert Eyci qeyd edib ki, Fondun fəaliyyətinin əsas məqsədi şirkətlərin kapitallaşmasının, orta hesabla, $0,5 -1 mlrd. artırılmasıdır. Buna görə də sərmayələr üçün şirkətlərin seçimində bir çox amillər nəzərə alınacaq. O bildirib ki, Fondun Məsləhət Şurasının üzvü kimi Azərbaycana böyük diqqət ayırmağı məsləhət görəcək. Belə ki, ölkənin İKT sektoru yaxşı potensiala malikdir. O İKT-nin inkişafına nümunə kimi Azərbaycan ərazisində innovasiya zonasının yaradılması üzrə layihəni göstərib. Bu zonada yüksək texnologiyalı məhsullar yaratmaq planlaşdırılır.
Onun sözlərinə görə, MDB ölkələri, o cümlədən Azərbaycan bazar iqtisadiyyatı quruculuğu çərçivəsində, kommunikasiya infrastrukturlarını müasirləşdirirlər və Cisco şirkəti qabaqcıl texnologiyalar, yeni biznes-modellər və müxtəlif xidmətlərin göstərilməsi üçün İnternetdən novator istifadə üsulları hazırlayan yerli şirkətlərə birbaşa və bilavasitə sərmayələr yolu ilə texnoloji innovasiyaların sürətli tətbiqinə yardım edərək bu dəyişikliklərin katalizatoru olmağa can atır.
Robert Eyci bildirib ki, Cisco bu məqsədlərlə MDB ölkələri və Azərbaycanın dövlət qurumları ilə müxtəlif səviyyələrdə daha sıx əməkdaşlığa hazırdır.
Almaz Capital Partners-in rəhbəri Aleksandr Qalitski bildirib ki, Fond birinci mərhələdə kapitalda 20-50 faiz iştirakla, 12-15 layihəyə sərmayə yatırmağı planlaşdırır. Sərmayələrin həcmi şirkətin fəaliyyət dövrü ərzində bir neçə yüz mindən $7-9 milyonadək ola bilər.