Azərbaycan, Bakı, 16 sentyabr/ Trend , müxbir S.Babayeva/ Azərbaycanın Rabitə və İnformasiya Texnologiyaları Nazirliyinin Azerpocht Dövlət Müəssisəsində (DM) "Maliyyə xidmətlərinin inkişafı" layihəsi çərçivəsində, Azerpocht üçün Avtomatlaşdırılmış Korporativ İnformasiya Sistemi layihəsinin icrasına nəzarət üzrə rəhbər Komitənin ilk iclası keçirilib.
Nazirliyin verdiyi xəbərə görə, iclasda bu sistemin alınması üzrə tenderin qalibi HP və onun tərəfdaşları - Colvir və Sinam şirkətlərinin nümayəndələri iştirak edib.
Səkkiz üzvdən ibarət Komitəyə Rabitə Nazirliyi, Azərbaycan Milli Bankı, Azerpocht, FACP Konsaltinq şirkətləri, icraçı -şirkətin nümayəndələri daxildir.
Komitə üzvləri iclasda layihənin modulları - I (əsas kitab və sistemin nüvəsi), II (pul köçürmələri), III (poçt xidmətləri) modullar haqqında məlumatlandırılıblar. Bundan əlavə, hesabat məruzələri dinlənilib və ilin sonuna planlaşdırılan tədbirlər müzakirə edilib.
"Maliyyə xidmətlərinin inkişafı" layihəsinin ümumi dəyəri $17,5 mln.-dur. Bu vəsaitin $12,5 mln.-u kredit qismində Dünya Bankı, $5 mln.-u Azərbaycan hökuməti tərəfindən ayrılıb.
Layihənin əsas məqsədi kənd yerləri və kiçik şəhərlərdə maliyyə xidmətlərindən istifadə imkanlarının təkmilləşdirilməsi, biznes-infrastrukturun yaradılması yolu ilə inkişaf və iqtisadi artıma yardım etməkdir.
Rəhbər Komitənin növbəti iclasının dekabrın əvvəlində keçirilməsi planlaşdırılıb.
