Azərbaycan, Bakı, 21 avqust / Trend , müxbir Q.Vəliyev /
Azərbaycan Respublikasının nazirlik və qurumları yeni "2009-2012-ci illərdə rabitə və informasiya texnologiyalarının inkişafı üzrə dövlət proqramı"nı nəzərdən keçirirlər", - Trend -a Nazirlər Kabinetindən deyilib.
Mənbənin məlumatına görə, layihə son razılaşdırılma mərhələsindədir. Bundan sonra sənəd təsdiq üçün Azərbaycan Prezidentinə təqdim ediləcək.
Yeni dövlət proqramı qurumlararası xarakter daşıyacaq və özündə konkret sahə qərarları üzrə çoxsaylı layihələri ehtiva edəcək.
Ümumilikdə layihələr cəmiyyətdə İKT-nin geniş tətbiqinə, "Elektron hökumət"in formalaşdırılması və göstərilən elektron xidmətlərinin spektrinin genişlənməsinə kömək edəcək.
Bu gün bir sıra dövlət qurumları tərəfindən əhali ilə dövlət sektorunun qarşılıqlı fəaliyyətini asanlaşdıran bəzi elektron xidmətlər tətbiq edilib. Hazırda sahibkarlar elektron vergi bəyannaməsi təqdim edə, vergilər barədə Vergilər Nazirliyinin informasiya resursu vasitəsilə birbaşa suallar yönəldə, abituriyentlər, yaxud dövlət xidmətinə qəbul olmaq istəyən şəxslər elektron ərizə forması təqdim edə, seçicilər seçki siyahılarındakı məlumatları dəqiqləşdirə və s. bilirlər.
Bütün bu imkanlar ilbəil artacaq, əhali isə dövlət orqanları ilə yeni, daha rahat qarşılıqlı fəaliyyət formalarından istifadə edə biləcək.
Məqalə müəllifi ilə əlaqə ünvanı: [email protected]
