Azərbaycan, Bakı, 22 fevral / Trend , müxbir H.Vəliyev/
Rabitə və İnformasiya Texnologiyaları Nazirliyinin Dövlət Radiotezliklər İdarəsi (DRİ) Azərbaycanın Azerspace milli peykinin və Ukraynanın Ukrsat peykinin tezliklərinin mənimsənilməsinin koordinasiyası üzrə danışıqlar aparacaqlar. Bu barədə DRİ-nin məlumatında bildirilir.
Fevralın 22-24-də Kiyevdə keçiriləcək iclasda tərəflər Azərbaycan və Ukrayna peyk şəbəkələrində mümkün maneənin səviyyəsinin müəyyən olunması və peyk şəbəkələrinin koordinasiyasına nail olunması üzrə danışıqlar aparacaqlar.
Azerspace milli peykinin yerləşdirilməsi üçün ITU (International telecommunication Union) tərəfindən 43.2, 58.5 və 96 dərəcə şərq uzunluğunda mövqe ayrılıb. ITU peykləri yuxarıda sadalanan mövqelərdə yerləşəcək ölkələrin siyahısını Azərbaycana təqdim edib.
Bu günədək peyk sistemlərinin tezliklərinin mənimsənilməsinin koordinasiyası məsələləri Qazaxıstanın İnformasiyalaşdırma və Rabitə Agentliyi ilə müzakirə edilib.
Bununla yanaşı, Dövlət Radiotezliklər İdarəsi Regional Rabitə Birliyinin (RRB) Radiotezlik spektrindən istifadənin tənzimlənməsi komissiyası və Peyk rabitəsi, televiziya və səs radio yayımı komissiyasının birgə iclasında iştirak edəcək. İclas fevralın 25-26-da Kiyevdə keçiriləcək.
Komissiyalar 2012-ci ildə keçiriləcək Ümumdünya radiorabitə konfransına hazırlıq məsələsini, RRB ölkələrində rəqəmsal televiziyanın tətbiqi, həmçinin MDB ölkələrində tezliklərin paylanmasına dair ümumi cədvəlin hazırlanması, tezliklərin mənimsənilməsinin koordinasiyası üzrə tövsiyələrin yerüstü və müəyyən xidmətlər tərəfindən istifadəsi, perspektivli simsiz genişzolaqlı giriş texnologiyalarının tətbiqi məsələləri müzakirə edəcək.
