Azərbaycan, Bakı, 18 mart / Trend , müxbir H.Əliyev/
"Azərbaycanın təhsil şəbəkəsi" layihəsi "Cisco Networkers Awards 2010" müsabiqəsinin finalına çıxıb. Bunu "Cisco" Mərkəzi Asiya sistem mühəndisliyi üzrə menecer Rövşən Əkbərov deyib.
Müsabiqənin qalibləri martın 29-da Bəhreyndə elan olunacaq. Müsabiqə inkişaf etməkdə olan bazarlara malik ölkələrdə "Cisco" tərəfdaşları arasında keçirilir.
"Cisco - AzEduNet" və ULTRA tərəfdaşları tərəfindən həyata keçirilən "Azərbaycanın təhsil şəbəkəsi" layihəsi "Society Impacting Network" nominasiyasına irəli sürülüb.
Əkbərovun sözlərinə görə, finalda Azərbaycan "Küveytin təhsil şəbəkəsi" və "İordaniya milli genişzolaqlı şəbəkə" layihələri ilə yarışacaq.
"Azərbaycanın təhsil şəbəkəsi" layihəsi 2008-2012-ci illərdə təhsil sisteminin informasiyalaşdırılması üzrə Dövlət Proqramı çərçivəsində "AzEduNet " təşkilatı tərəfindən həyata keçirilir. Layihə çərçivəsində məktəbləri, ölkənin təhsil müəssisələrini və Təhsil Nazirliyinin strukturlarını birləşdirən yüksəksürətli korporativ intranet şəbəkəsi yaradılır. Şəbəkə təhsil müəssisələrinə Təhsil Nazirliyinin İnformasiya-Resurs Mərkəzində yerləşdirilmiş elektron təhsil resurslarına və idarəetmə sistemlərinə sürətli çıxış imkanları yaradır.