Azərbaycan, Bakı, 20 iyul /Trend, müxbir Q.Vəliyev/
Azərbaycan və Türkiyə arasında pul köçürmələrinin elektron sistemi tətbiq edilib. Bu barədə çərşənbə axşamı Trend-ə Rabitə və İnformasiya Texnologiyaları Nazirliyindən bildiriblər.
Xidmətin istismarı Azərbaycanın poçt operatoru "Azərpoçt" MMC-nin poçt şöbələrində pul köçürmələrini göndərməyə və almağa imkan verir.
Pul köçürmələri sistemi xərcləri xeyli azaltmağa və eyni zamanda, pul köçürmələri sahəsində müştəri bazasını genişləndirməyə imkan verir ki, bu da əməliyyatlar üzrə effektivliyin artırılmasına səbəb olur.
Azərbaycan və Türkiyə arasında pul köçürmələrinin elektron sistemi tətbiq edilməsi məsələsi ilk dəfə 2008-ci ilin noyabr ayında türk poçt nazirliyi nümayəndələrinin Azərbaycana səfəri zamanı qaldırılıb.
Başlanğıcda, sistem kifayət qədər təhlükəsiz olmadığı üçün, layihənin reallaşdırılması qeyri-müəyyən müddətə təxirə salınıb. Layihə üzərində iş davam etdirilib və mütəxəssislər tərəfindən pul köçürmələri prosedurunun təhlükəsizliyinin təmin edilməsi ilə bağlı fəaliyyət aparılıb.
Hazırda poçt köçürmələri fiziki şəxslər tərəfindən pul vəsaitlərinin köçürülməsi üzrə ən geniş yayılan üsuldur. "Azərpoçt" bütün respublika üzrə geniş şöbə şəbəkələrinə malikdir və hətta ölkənin ən ucqar bölgələrində zəmanətli xidmətlərin təqdim edilməsinə təminat verir.
Poçt operatoru özündə bütün respublikada xidmət göstərən 70-dən çox filialı və 1600-dən çox poçt rabitəsi obyektini birləşdirir ki, bu da onu pul köçürmələri təqdim edən maliyyə strukturları arasında rəqabətqabiliyyətli edir.