Azərbaycan, Bakı, 2 avqust /Trend, müxbir H.Vəliyev/
Azərbaycanın "Ultra" informasiya texnologiyaları (İT) şirkəti İqtisadi İnkişaf Nazirliyində elektron sənəd dövriyyəsi sisteminin tətbiqini başa çatdırır. Bu barədə şirkətin məlumatında deyilir.
Layihə bütün kağız kargüzarlığı, kadr və maliyyə hesabatlarının elektron formasına tam keçidi nəzərdə tutur.
Layihə mərhələli şəkildə həyata keçirilir və bu günədək nazirlikdə daxili sənəd dövriyyəsini avtomatlaşdırmağa imkan verən bir sıra modullar tətbiq edilib. İdarədə "Megapolis DocNet" sistemindən istifadə olunur ki, bu sistem məqsədli ünvanlar üzrə sənədlərin daha operativ hazırlanması və yayılmasına imkan verir. Bu da insan resurslarından və kağız daşıyıcılardan istifadənin səviyyəsini aşağı salır. Nazirlikdə daxili korporativ səviyyədə elektron rəqəmli imzadan da istifadə olunur.
"Vətəndaşların müraciətlərinə baxılma" və "Kadrların idarə olunması" modullarının tətbiqi üzrə işlər başa çatmaq üzrədir.
"Vətəndaşların müraciətlərinə baxılma" modulu vətəndaşlara idarəyə ərziə vermək və ona baxılma mərhələlərini internet şəbəkəsi vasitəsilə izləməyə, "Kadrların idarə olunması" modulu isə kadrların peşəkarlıq səviyyəsinin artırılmasına imkan verir. Perspektivdə idarəetmənin elektron sistemi nazirliyin tabeliyində olan bütün strukturlar üzrə genişlənəcək.
Həmçinin, şirkət tərəfindən Azərbaycanın Maliyyə Nazirliyində elektron sənəd dövriyyəsi sisteminin tətbiqi haqda anlaşma imzalanıb. Analoji layihələrin respublikanın daha iki nazirliyində də reallaşdırılması planlaşdırılır.